1 Kings 8
1 為到愛對大衛城—就係錫安將上主个約櫃請入聖殿，所羅門王召集以色列該兜長老㧯逐宗族、逐支族該兜族長到耶路撒冷。
2 佢等就在以他念月，就係第七月，搭寮仔節个時聚集到所羅門王該位。
3 當所有个以色列長老來到个時，該兜祭司就將約櫃扛起來，
4 利未人㧯祭司也將上主个約櫃、聖帳篷並所有个聖用品搬到聖殿前。
5 所羅門王㧯全部以色列人民聚集在約櫃頭前，獻牛羊做牲儀，數目多到無法度算。
6 該兜祭司就將上主个約櫃扛入聖殿，放在至聖所兩隻基路伯个翼胛下。
7 基路伯打開个翼胛遮等約櫃㧯扛約櫃个槓仔。
8 槓仔當長，企在至聖所頭前个人正做得看到槓仔个兩頭，對其他方向就看毋到。(這兜槓仔今晡日還在該位。)
9 約櫃肚只有放等兩垤石版，無其他東西；這兩垤石版係以色列人民對埃及出來、上主㧯佢等立約个時，摩西在西奈山將它兜放在約櫃肚个。
10 該兜祭司離開聖殿个時，忽然間有雲充滿聖殿，
11 發出上主个榮光，使祭司無辦法繼續在聖殿底背服事。
12 該時，所羅門祈禱講：「上主啊，你決定愛住在賁賁个烏雲肚。
13 𠊎已經為你起一座偉大个殿，做你永遠住个所在。」
14 以色列會眾全部企在該位。所羅門王轉過身來，面對會眾，為佢等向上帝求福。
15 佢講：「讚美上主—以色列个上帝！佢親自完成佢向吾爸大衛所應許个；佢識親嘴㧯大衛講：
16 『自從𠊎將𠊎个子民帶出埃及以來，𠊎無選以色列㖠座城來起敬拜𠊎个聖殿；總係𠊎選你—大衛來統治𠊎个子民。』」
17 所羅門繼續講：「吾爸大衛計劃起聖殿，做敬拜上主—以色列上帝个所在。
18 毋過上主對佢講：『你想愛為𠊎起聖殿，這心意當好；
19 總係你做毋得開工，只有你个孻仔—你親生个孻仔正做得起𠊎个聖殿。』
20 「這下上主已經實現佢个應許。𠊎承接吾爸大衛做以色列个王，又已經起好敬拜上主—以色列上帝个聖殿。
21 𠊎也在聖殿底背預備好放約櫃个地方。約櫃底背放等立約个石版；這就係上主𢱋𠊎等个祖先出埃及時㧯佢等立个約。」
22 接等，所羅門在以色列會眾面前企在上主个祭壇前，向天擎起雙手祈禱講：
23 「上主—以色列个上帝啊，天頂地上無別个神做得㧯你比！你信守你㧯你僕人所立个約：該兜一心一意順服你个，你就愛向佢等顯出慈愛。
24 你親自完成你向你个僕人—吾爸大衛个應許，到今晡日，逐隻字、逐句話全部實現了。
25 上主—以色列个上帝啊，這下𠊎求你也實現你向吾爸所講个其他个應許：你識㧯佢講，若係佢个後代像佢共樣認真遵行你个法律，佢个後代就會永遠有人做以色列个王。
26 所以，以色列个上帝啊，求你實現向你个僕人—吾爸大衛所應許个話。
27 「上帝啊，你斷真會住在地上嗎？就算天㧯天頂个天也毋罅你住，𠊎所起个這聖殿算麼介呢？
28 上主—𠊎个上帝啊，𠊎係你个僕人；求你聽𠊎个祈禱，聽𠊎今晡日在你面前个求喊。
29 求你日夜看顧這聖殿；這係你選做敬拜你个所在。你个僕人面對這聖殿祈禱个時，求你聽𠊎个祈求。
30 你个僕人㧯你个子民以色列面對這所在祈禱个時，求你對天頂你住个所在聽𠊎等个祈求，赦免𠊎等。
31 「若係有人得罪同胞被人告，被人帶到這聖殿—你个祭壇前，發誓講佢係無罪个，
32 上主啊，求你對天頂聽，來審判你个僕人：有罪个，就照佢該得个責罰佢；無罪个，就判佢無罪，還佢清白。
33 「若係你个子民以色列因為得罪你，被敵人打贏，後來又悔改歸向你，尊你个名做大，到這聖殿來，謙卑祈求你个赦免，
34 求你對天頂聽佢等个祈求，赦免你子民个罪，𢱋佢等轉到你賜給佢等祖先个這垤土地。
35 「若係有你个子民得罪你，你使天無落雨，後來佢等悔改，尊你个名做大，面對這聖殿，謙卑向你祈禱，
36 求你對天頂聽佢等个祈求。求你赦免你个僕人—以色列人民个罪，教佢等行正直个路。該時，上主啊，求你落水在你个土地上，就係你賜給你子民做產業个土地。
37 「若係國內有飢荒、發瘟、燒風、生菇、草蜢、禾蝦，抑係你个子民被仇敵圍困，抑係堵到其他災禍病痛，
38 求你聽佢等个祈禱。若係你个子民以色列中有人感覺有罪、內心憂傷，伸出雙手向這聖殿祈禱，
39 求你對天頂你住个所在聽佢等个祈求，赦免佢等，又幫助佢等。只有你深知人心。求你照逐儕所做个款待佢等，
40 使你个子民永遠在你賜給𠊎等祖先个土地上敬畏你。
43 求你對天頂你住个所在聽佢个祈求，照佢所求个答應佢，使全世界个人全部像你个子民以色列共樣認識你，敬畏你，知𠊎所起个這聖殿就係敬拜你个所在。
44 「若係你个子民照你个命令上戰場㧯敵人相㓾，無論佢等在麼介地方，面對你所選个這城㧯𠊎為你起个這聖殿祈禱，
45 求你聽佢等。求你對天頂聽佢等个祈禱，使佢等得勝。
46 「若係你个子民得罪你(世上無人係無犯罪个)，你發譴个時准敵人打贏佢等，將佢等捉去別个地方，無論係遠抑係近，
47 也求你聽你子民个祈禱。若係佢等在該位悔改，向你祈求，承認佢等犯罪、行事邪惡，上主啊，求你聽佢等个祈禱。
48 若係佢等在該地方誠心誠意悔改，面對你賜給𠊎等祖先个這垤土地向你祈禱，面對你所選个這城㧯𠊎為你起个這聖殿祈禱，
49 求你聽佢等。求你對天頂你住个所在聽佢等个祈求，憐憫佢等。
50 求你赦免你个子民，就係該兜得罪你个人，求你赦免佢等所有个過犯，俾仇敵也會憐憫佢等。
51 佢等係你个子民，係你个產業，係你對埃及該鎔鐵个火爐肚𢱋出來个。
54 所羅門一直跪在祭壇前，擎起雙手祈禱；佢向上主祈禱煞，就企起來。
55 佢大聲祈求上主賜福給以色列全會眾；佢講：
56 「頌讚上主！佢實現佢个應許，賜平安給佢个子民，通過佢个僕人摩西所講个話，一句也無落空。
57 願上主—𠊎等个上帝㧯𠊎等同在，就像佢㧯𠊎等个祖先共下一樣。願佢永遠毋會離開𠊎等，毋會㧒掉𠊎等。
58 願佢使𠊎等个心歸向佢，使𠊎等能對頭到尾照佢个旨意生活，遵守佢吩咐𠊎等祖先个法律誡命。
59 𠊎在上主面前祈求个這兜話，願上主—𠊎等个上帝日夜紀念；願佢照佢个僕人㧯佢个子民以色列逐日个需要憐憫𠊎等。
60 恁樣，世上个萬民全部正會知，只有上主係上帝，無別个上帝。
61 願你等大家，就係上帝个子民，永遠對上主—𠊎等个上帝忠誠，遵行佢所有个法律㧯誡命，像今晡日恁樣。」
62 然後，所羅門王㧯全以色列人民獻牲儀給上主。
63 所羅門獻兩萬兩千隻牛㧯十二萬隻羊做平安祭。恁樣，王㧯所有个人民為上主个聖殿舉行奉獻禮。
64 該日，王也將聖殿頭前庭院中个廣場分別為聖，在該位獻燒化祭、素祭㧯平安祭所用頭牲个油。所羅門恁樣做係因為聖殿頭前个銅祭壇忒細，無辦法放恁多个祭物。
65 所羅門㧯所有个以色列人民在聖殿守搭寮仔節七日，又加七日，總共十四日。民眾遠遠對北方哈馬隘口㧯南方个埃及邊境逐所在前來參加大會。
66 節期最後一日，所羅門喊民眾好轉了；佢等全部為王祝福，歡歡喜喜轉屋下去，因為上主賞賜一切个恩惠給佢个僕人大衛㧯佢个子民以色列。